کتاب: کچھ شامیں فکرِ اقبال کے ساتھ
مصنف: سید نصیر شاہ
’’کچھ شامیں فکرِ اقبال کے ساتھ‘‘ معروف محقق، دانش ور اور نقاد سید نصیر شاہ کے علامہ محمد اقبال کی حیات سے متعلق تحقیقی مقالات کا مجموعہ ہے، جسے فکشن ہاؤس لاہور نے شائع کیا ہے۔ 270 صفحات پر مشتمل یہ کتاب اقبال شناسی کے روایتی تصورات سے ہٹ کر شاعرِ مشرق کی زندگی کے مختلف گوشوں کا مطالعہ پیش کرتی ہے۔ اس میں مصنف نے اقبال کی شخصیت کو عقیدت کے پردوں میں چھپانے کے بجائے تحقیق، تنقیدی بصیرت اور حقیقت پسندی کی روشنی میں سمجھنے کی کوشش کی ہے۔
سید نصیر شاہ کا شمار ان اہلِ علم میں ہوتا ہے جن کا مطالعہ محض ادب تک محدود نہیں، بلکہ تاریخ، فلسفہ، عمرانیات، سیاسیات اور مذہبی فکر جیسے متنوع شعبوں تک پھیلا ہوا ہے۔ انگریزی، عربی اور فارسی زبانوں پر ان کی دسترس ان کے علمی افق کو وسعت بخشتی ہے۔ اقبال کے بارے میں ان کے مقالات بھی اسی وسیع مطالعے اور آزادانہ طرزِ فکر کے آئینہ دار ہیں۔ وہ کسی عظیم شخصیت کی قدر و منزلت کو غیر ضروری مبالغے سے بڑھانے کے بجائے اس کے اصل مقام، فکری پس منظر اور انسانی پہلوؤں کو سمجھنے پر زور دیتے ہیں۔
زیرِ نظر کتاب میں شامل مقالات ریٹائرڈ جسٹس جاوید اقبال کی تصنیف زندہ رود کی اشاعت کے بعد تحریر کیے گئے تھے۔ ان میں حیاتِ اقبال کے مختلف پہلوؤں کا جائزہ لیتے ہوئے ایسے سوالات اور زاویۂ نظر سامنے آتے ہیں جو قاری کو مروجہ تصورات پر ازسرِنو غور کرنے کی دعوت دیتے ہیں۔ مصنف کی کوشش ہے کہ اقبال کی عظمت کو محض عقیدت کے اظہار تک محدود نہ رکھا جائے، بلکہ ان کی شخصیت اور زندگی کو تاریخی شواہد اور معروضی مطالعے کی بنیاد پر سمجھا جائے۔
اس کتاب کی اہمیت اس حقیقت میں پوشیدہ ہے کہ یہ اقبال شناسی میں تحقیق اور تنقیدی شعور کی ضرورت اجاگر کرتی ہے۔ سید نصیر شاہ شخصیت پرستی اور بے جا تقدیس کے بجائے دلیل، حقیقت پسندی اور علمی دیانت کو ترجیح دیتے ہیں۔ یہی رویہ ان کی تحریروں کو ایک منفرد شناخت عطا کرتا ہے۔ یہ کتاب اقبال کے بارے میں پہلے سے قائم تصورات کو پرکھنے، ان کی زندگی کے مختلف گوشوں کو نئے انداز سے دیکھنے اور سنجیدہ مطالعے کا ذوق رکھنے والوں کے لیے ایک فکر انگیز علمی کاوش ہے۔