“پاکستانی تاریخ کا قتل” نامور پاکستانی تاریخ دان خورشید کمال عزیز (کے کے عزیز) کی مشہور کتاب “دی مرڈر آف ہسٹری” (The Murder of History) کا اردو ترجمہ ہے، جس کو حمز ہ ار شد نے ترجمہ کیا ہے۔ یہ کتاب پاکستان کے سکولوں اور کالجوں میں پڑھائی جانے والی تاریخ، مطالعۂ پاکستان اور معاشرتی علوم کی درسی کتب کا تنقیدی اور تحقیقی جائزہ پیش کرتی ہے۔
مصنف نے مختلف کلاسوں کے نصاب میں شامل درسی کتابوں کا باریک بینی سے مطالعہ کرتے ہوئے ان میں موجود تاریخی اغلاط، حقائق کی تحریف، اہم واقعات کے اخفا اور یک رخے بیانیے کو مستند حوالوں کے ساتھ بے نقاب کیا ہے۔
خورشید کمال عزیز اس کتاب میں محض غلطیوں کی نشاندہی تک محدود نہیں رہتے بلکہ ان کے اسباب، طلبہ کی ذہنی تشکیل پر مرتب ہونے والے اثرات اور قومی شعور پر ان کے دور رس نتائج کا بھی گہرا تجزیہ کرتے ہیں۔ یہ کتاب تاریخ، نصابِ تعلیم اور قومی بیانیے کے باہمی تعلق کو سمجھنے کی ایک سنجیدہ کاوش ہے، جو قاری کو مروجہ تصورات پر ازسرِنو غور کرنے اور تاریخی حقائق کو تنقیدی نظر سے دیکھنے کی دعوت دیتی ہے۔
