کتاب: دودھ سے علاج
مصنف: قمر تسکین
تعارف سعیدخان
’’دودھ سے علاج‘‘ ایک ایسی اہم اور معلوماتی کتاب ہے جو دودھ کی غذائی و شفائی خصوصیات کو واضح اور مستند انداز میں پیش کرتی ہے۔ اس میں بتایا گیا ہے کہ دودھ صرف ایک مکمل غذا نہیں، بلکہ بے شمار بیماریوں کا قدرتی علاج اور انسان کی قوتِ مدافعت بڑھانے کا مؤثر ذریعہ بھی ہے۔
مصنف قمر تسکین نہایت دلکش اور مدلل اسلوب میں سمجھاتے ہیں کہ انسان نے مصنوعی دواؤں پر حد سے زیادہ انحصار کر کے اپنی فطری صحت کو کمزور کر لیا ہے۔ ہر چھوٹی بڑی تکلیف میں فوراً گولی، کیپسول یا شربت کی طرف بھاگنا ہمارا معمول بن چکا ہے، جب کہ دیگر جاندار صرف اپنی غذا کی بدولت تندرست اور مضبوط رہتے ہیں۔ وہ سوال اٹھاتے ہیں کہ جب فطرت نے انسان کو بھی بے شمار قدرتی نعمتیں عطا کی ہیں تو پھر انسان کیوں دواؤں کے دھندے کا شکار ہو کر صحت کے بنیادی اصول بھول بیٹھا ہے؟
کتاب موجودہ دور کی تلخ حقیقت پر روشنی ڈالتی ہے کہ اشتہارات میں دعووں کی بھرمار، ہسپتالوں کی کثرت اور نت نئی دواؤں کی ایجاد کے باوجود امراض کم ہونے کے بجائے تیزی سے بڑھ رہے ہیں۔ اس کی وجہ یہ ہے کہ بیماری کو دبانے پر تو زور ہے مگر اس کے اصل سبب کو سمجھ کر اسے ختم کرنے کی کوشش نہیں کی جاتی۔
اسی تناظر میں مصنف دودھ کی عظیم افادیت بیان کرتے ہیں کہ یہ جسم میں طاقت، خون اور توانائی کے بھرتے ہوئے ایک ایسی فطری دوا ہے جو اعصاب اور تمام اعضائے جسمانی کو اعتدال میں رکھتی ہے۔ اس کے مسلسل اور درست استعمال سے کئی بیماریوں کا سدِ باب ممکن ہے۔
مختصر یہ کہ یہ کتاب انسان کو فطرت کے قریب آ کر صحت پانے کا نسخہ عطا کرتی ہے کیونکہ فطرت بہترین حکیم ہے اور دودھ اس کا سادہ مگر معجزاتی علاج۔